Ο Χάμπον πάει σο Αχέπα

Ο Χάμπον εθεέλνε να πάει άσο Κιλκίς ση Θεσσαλονίκη ση θεία νατ την Πελαϊα σο Αχέπα ντο έτον αρρωστέσα. 
Αμάν τα λεωφορεία είχαν απεργία. Σίτε στέκ α ση στράταν ελέπ έναν ταξί και λέει σον ταξιτζή:
--- Ταξιτζή ποσά παράδας αραεύς να πέρς με και πας ση Θεσσαλονίκη ;
--- Εκατό ευρώ, λέει ο ταξιτζής.
--- Ουχί ατόσα παράδας πα κι έχω κατ κόψουν, λέει ο Χάμπον
--- Αίντε ογδόντα μπές απές να φεύομαι, λέει ο ταξιτζής
--- Ντο λες κι έχω ατόσα παράδας κατ πίσον, λέει ξανά ο Χάμπον
--- Άλλο ντο να κόφτω νέπε αίντε ας λέγομαι 60, λέει γουζεμένος ο ταξιτζής
--- Κι άλλο πολλά εν κατ καλόν πίσον, λέει ο Χάμπον
--- Την ψυμ εξέγγες λέει ο ταξιτζής αίντε δουλείαν κι έχω α δις με 40€ μαναχόν τα πετρέλαια και πάμε
--- Έντονε λέει ο Χάμπον ας πάμε
Από κάποτε έφτασαν σο Αχέπα και λέει ο Χάμπον σίτε Κατηβέν άσο ταξί:
--- Πολλά ευχαριστώ σε ο Θεον να δίσε υγείαν, άντε γειά λέει ο Χάμπον
--- Μερ πας κι θα δις με τα παράδας ντο σινετάγαμε, λέει σασουρεμένος ο ταξιτζής
--- Τερέν εγώ παράδας κι έχω να τινέζ το παντόλ ιμ τιδέν κι έχ απές μανάχον χοσέτεα και τόζεα θα εβρίκς,λέει ο Χάμπον
--- Ευλογημένε θα πέρωσε και στέκω, παράδας αφού κι είχες το παζάρ ντο επίνες ατο, φουνίζ και τσαίζ ο ταξιτζής
--- Ενούντσα θα χάνς που θα χάνς ετέρεσα να μη χάνς πολλά, λέει ατόν ο Χάμπον!!!!

ΤΟ ΚΕΙΜΕΝΟ ΣΤΑ ΠΟΝΤΙΑΚΑ ΑΝΕΚΔΟΤΑ
ΤΟ ΕΠΙΜΕΛΕΙΤΑΙ Ο ΧΡΗΣΤΟΣ ΞΑΝΘΟΠΟΥΛΟΣ
ΜΕΛΟΣ ΤΗΣ ΟΜΑΔΑΣ Τ'ΜΕΤΕΡΟΝ Η ΡΑΤΣΑ.